દર્દીઓને મળતી સારવાર, નિદાનની સુવિધાઓ અને તબીબોની કામગીરી અંગે મેળવી વિગતો; આરોગ્ય સેવાઓમાં કોઈ કચાશ ન રહે તે માટે જરૂરી સૂચનો અને રજૂઆતો ધ્યાને લેવા ખાતરી આપી
વાપીને તાજેતરમાં મુખ્યમંત્રી ભૂપેન્દ્ર પટેલના હસ્તે લોકાર્પણ થયેલી અત્યાધુનિક સબ ડિસ્ટ્રિક્ટ હોસ્પિટલની નાણાંપ્રધાન અને શહેરી વિકાસ મંત્રી કનુભાઈ દેસાઈએ મુલાકાત લઈ હોસ્પિટલની વિવિધ આરોગ્યલક્ષી સુવિધાઓનું નિરીક્ષણ કર્યું હતું. આ મુલાકાત દરમિયાન તેમણે હોસ્પિટલમાં સારવાર માટે આવેલા દર્દીઓ સાથે સીધો સંવાદ સાધી તેમને મળતી આરોગ્ય સેવાઓ, તબીબો દ્વારા કરવામાં આવતી સારવાર તેમજ નિદાનની સુવિધાઓ અંગે વિસ્તૃત જાણકારી મેળવી હતી.
દર્દીઓ સાથે સીધો સંવાદ કરી સુવિધાઓની માહિતી મેળવી
હોસ્પિટલની મુલાકાત દરમિયાન કનુભાઈ દેસાઈએ વિવિધ વિભાગોમાં જઈ દર્દીઓ અને તેમના પરિજનો સાથે વાતચીત કરી હતી. સરકારી હોસ્પિટલમાં ઉપલબ્ધ સારવારની ગુણવત્તા, દવાઓ, નિદાનની વ્યવસ્થા અને તબીબો તથા આરોગ્યકર્મીઓના વ્યવહાર અંગે દર્દીઓનો પ્રતિભાવ જાણ્યો હતો. સારવાર માટે આવેલા દર્દીઓએ પણ સરકાર દ્વારા ઉપલબ્ધ કરાવવામાં આવેલી આરોગ્ય સુવિધાઓ અંગે સંતોષ વ્યક્ત કરી હોસ્પિટલમાં મળતી સેવાઓની પ્રશંસા કરી હતી.
આરએમઓ સાથે બેઠક કરી વધુ સુદૃઢ સુવિધાઓ અંગે ચર્ચા
કનુભાઈ દેસાઈએ હોસ્પિટલના આરએમઓ સાથે પણ વિસ્તૃત ચર્ચા કરી હતી. હોસ્પિટલમાં હાલ ઉપલબ્ધ સુવિધાઓ, દર્દીઓની સંખ્યા, સારવારની વ્યવસ્થા તેમજ ભવિષ્યમાં આરોગ્ય સેવાઓને વધુ સુદૃઢ અને અસરકારક બનાવવા માટે જરૂરી બાબતોની સમીક્ષા કરી હતી. હોસ્પિટલમાં આવતા દર્દીઓને સમયસર અને ગુણવત્તાયુક્ત સારવાર મળી રહે તે માટે જરૂરી વ્યવસ્થાઓ અંગે પણ તેમણે સૂચનો મેળવ્યા હતા.
આરોગ્ય સુવિધામાં કોઈ કચાશ ન રહે તે માટે મંત્રીની સૂચના
આ પ્રસંગે કનુભાઈ દેસાઈએ જણાવ્યું હતું કે, હોસ્પિટલમાં દર્દીઓને વધુ સારી અને સુદૃઢ આરોગ્ય સુવિધાઓ મળી રહે તે સરકારની પ્રાથમિકતા છે. આરોગ્ય ક્ષેત્રે હજુ પણ કોઈ સુવિધાની કડી ખૂટતી હોય અથવા દર્દીઓને સારવાર અને નિદાન દરમિયાન કોઈ મુશ્કેલી પડતી હોય તો તે બાબત તેમના ધ્યાને લાવવા અપીલ કરી હતી. લોકોની આરોગ્ય સુખાકારીમાં કોઈ પણ પ્રકારની કમી ન રહે તે માટે જરૂરી કામગીરી અને વ્યવસ્થાઓ સુનિશ્ચિત કરવા તેમણે તત્પરતા દર્શાવી હતી.
સ્થાનિક અગ્રણીઓ પણ મુલાકાતમાં જોડાયા
આ મુલાકાત દરમિયાન વાપી શહેર ભાજપ પ્રમુખ મનીષ દેસાઈ, વાપી મહાનગરપાલિકાની સ્ટેન્ડિંગ કમિટીના ચેરમેન સતીશભાઈ પટેલ સહિતના સ્થાનિક અગ્રણીઓ પણ ઉપસ્થિત રહ્યા હતા. તેમણે પણ હોસ્પિટલની વિવિધ સુવિધાઓ અને આરોગ્યલક્ષી વ્યવસ્થાઓ અંગે જાણકારી મેળવી હતી.
વાપી સહિત આસપાસના વિસ્તારના નાગરિકોને આધુનિક અને ગુણવત્તાયુક્ત આરોગ્ય સેવાઓ સ્થાનિક સ્તરે જ ઉપલબ્ધ થાય તે દિશામાં સબ ડિસ્ટ્રિક્ટ હોસ્પિટલ મહત્વપૂર્ણ સાબિત થઈ રહી છે. લોકાર્પણ બાદ મંત્રી દ્વારા કરવામાં આવેલી આ મુલાકાત અને દર્દીઓ સાથેના સીધા સંવાદને હોસ્પિટલની સેવાઓની ગુણવત્તા તથા સુવિધાઓમાં સતત સુધારો લાવવાના પ્રયાસ તરીકે જોવામાં આવી રહ્યો છે.
