[ad_1]
1530 ગામોના 5 લાખ જેટલા ખેડૂતોને ઓનલાઇન સહાય ચૂકવાશે
બે હેક્ટરની મર્યાદામાં હેક્ટર દીઠ 6800ની સહાય, 6 થી 24 ડિસેમ્બર સુધી અરજી કરી શકાશે
ગાંધીનગર : ગુજરાત સરકારે રાજ્યના અતિવૃષ્ટીગ્રસ્ત વિસ્તારો માટે આર્થિક સહાય પેકેજની જાહેરાત કરી છે. આ સહાય રાજ્યના 9 જિલ્લાના અસરગ્રસ્ત ખેડૂતોને બે હેક્ટરની મર્યાદામાં પ્રતિ હેક્ટર 6800 રૂપિયા અપાશે. ખેડૂતો 6 થી 24 ડિસેમ્બર સુધી અરજી કરી શકશે. ઓનલાઇન અરજીનો ખર્ચ સરકાર ભોગવશે. કુલ 7.65 લાખ હેક્ટર વિસ્તારમાં ખેડૂતોને સહાય આપવાનો નિર્ણય કરવામાં આવ્યો છે.
રાજ્યના પ્રવક્તા મંત્રીએ આ પેકેજની જાહેરાત કરતાં જણાવ્યું હતું કે અતિવૃષ્ટીથી થયેલા પાક નુકસાની સામે રાજ્ય સરકારે બીજા તબક્કાના રાહત પેકેજની જાહેરાત કરી છે જેમાં નવ જિલ્લાને આવરી લેવામાં આવ્યા છે. આ રાહત સહાય ખેડૂતોને એસડીઆરએફ અંતર્ગત ચૂકવવામાં આવશે.
આ સહાય પેકેજમાં નવ જિલ્લા ‘અમદાવાદ, બોટાદ, અમરેલી, ભાવનગર, ભરૂચ, જૂનાગઢ, છોટાઉદેપુર, પંચમહાલ અને વડોદરાનો સમાવેશ કરવામાં આવ્યો છે. આ જિલ્લાના 37 તાલુકાના 1530 ગામડાના પાંચ લાખ જેટલા ખેડૂતોને આ સહાય પેકેજ મળશે.
આ સહાય પેકેજ હેઠળ ખાતેદાર ખેડૂત કે જેના પાકને 33 ટકા કે તેથી વધુ નુકશાન થયું હોય તેમને આ સહાય બે હેક્ટરની મર્યાદામાં અપાશે. જે કિસ્સામાં જમીન ધારકતાના આધારે એસડીઆરએફના ધોરણો મુજબ જો સહાયની ચૂકવવાપાત્ર રકમ 4000 કરતા ઓછી થતી હોય તો પણ તેવા કિસ્સામાં ખાતા દીઠ ઓછામાં ઓછા 4000 ચૂકવવામાં આવશે.
જેમાં તફાવતની રકમ રાજ્ય બજેટમાંથી ચૂકવવામાં આવશે. આ પેકેજનો લાભ ખેડૂતોને ત્વરિત અને વિના-વિલંબે મળે અને સંપૂર્ણ કાર્યવાહી ઓનલાઈન થાય તે હેતુસર રાજ્ય સરકાર દ્વારા 6 ડીસેમ્બરથી કૃષિ રાહત પેકેજ પોર્ટલ ડિજિટલ ગુજરાત માધ્યમ પર ખુલ્લુ મૂકવામાં આવશે. 24મી ડિસેમ્બર સુધીમાં ખેડૂતો માટે સાધનિક કાગળો સહિત નજીકના ઈ-ગ્રામ સેન્ટર પર ઓનલાઈન અરજી માટેની વ્યવસ્થા ઉભી કરવામાં આવી છે. આ પેકેજ હેઠળ એસડીઆરએફમાંથી 520 કરોડ અને રાજ્ય બજેટમાંથી ન્યૂનતમ સહાય ચૂકવણીના તફાવતની 11 કરોડની સહાય ચૂકવાશે.
[ad_2]
Source link
