લદ્દાખ ખાતે સમુદ્ર સપાટીથી 11,155 ફૂટની ઊંચાઈએ 14 સપ્ટેમ્બર, 2025ના રોજ યોજાયેલી આંતરરાષ્ટ્રીય સ્તરની લદ્દાખ મેરેથોનમાં દાદરા અને નગર હવેલી તેમજ દમણ-દીવના સિલવાસા રનર્સ ગ્રુપના ચાર દોડવીરોએ ભાગ લીધો હતો અને ઉત્કૃષ્ટ પ્રદર્શન કરી પ્રદેશનું નામ રોશન કર્યું હતું.
આ મેરેથોનમાં ડૉ. ગીતા ગામિતે 42.195 કિમીની ફુલ મેરેથોન સફળતાપૂર્વક પૂર્ણ કરી હતી. જ્યારે શ્રીવાણી મુદલિગીરી, રંજીત નારખેડે અને અનિતા નારખેડેએ 21.09 કિમીની હાફ મેરેથોન સફળતાપૂર્વક પૂર્ણ કરી હતી.
લદ્દાખ હિમાલયની અતિ ઊંચાઈ અને ઓક્સિજનની અછતને કારણે દોડવીરો માટે આ મેરેથોન વિશાળ પડકારરૂપ સાબિત થાય છે. છતાંય સિલવાસાના દોડવીરોએ હિંમત અને ધૈર્ય બતાવીને પોતાની દોડ સફળતાપૂર્વક પૂર્ણ કરી અને પ્રદેશનું ગૌરવ વધાર્યું હતું.
ખાસ ઉલ્લેખનીય છે કે આ ટીમમાં બહુમતી મહિલા દોડવીરોની રહી હતી, જેમણે કઠિન પરિસ્થિતિઓમાં પોતાની હિંમત અને સંકલ્પશક્તિ દ્વારા સમાજમાં મહિલાઓની ભાગીદારી અને સશક્તિકરણનો સંદેશ આપ્યો હતો.
સિલવાસા રનર્સ ગ્રુપ માટે આ સિદ્ધિ ગૌરવની વાત છે. આશા છે કે ગ્રુપના દોડવીરો ભવિષ્યમાં પણ આ જ રીતે સમાજને સ્વસ્થ અને તંદુરસ્ત જીવન માટે દોડવા પ્રેરણા આપતા રહેશે.
