વલસાડ નજીક નેશનલ હાઇવે ૪૮ પર બાઇક સ્લીપ થઈ જતાં ગંભીર રીતે ઘવાયેલા યુવકની વ્હારે ધરમપુર ચોકડીની ૧૦૮ એમ્બ્યુલન્સની ટીમ આવી હતી. ટીમે યુવકને તાત્કાલિક સારવાર આપી હોસ્પિટલ ખસેડ્યો હતો અને તેની પાસેથી મળેલ રોકડ, મોબાઈલ ફોન અને બાઈકની ચાવી જેવો કિંમતી સામાન પોલીસને સુપ્રત કરી પોતાની ફરજની સાથે પ્રામાણિકતાનું ઉત્તમ ઉદાહરણ પૂરું પાડ્યું હતું.
બનાવની વિગત મુજબ, આજે બપોરે ૧:૩૦ વાગ્યાના અરસામાં ૧૦૮ કંટ્રોલ રૂમને નેશનલ હાઇવે નંબર ૪૮ પર નંદાવલા ગામ પાસે આવેલી પરિવાર હોટેલ નજીક માર્ગ અકસ્માતનો કોલ મળ્યો હતો. કોલ મળતાની સાથે જ ધરમપુર ચોકડી ૧૦૮ની ટીમના EMT મિમાંશા પટેલ તથા પાયલટ યાજ્ઞિક પટેલ તાત્કાલિક ઘટનાસ્થળે જવા રવાના થયા હતા.
સ્થળ પર પહોંચીને જોયું તો ૨૮ વર્ષીય યુવક રાજેશભાઈ પોતાની બાઈક પરથી પડી જવાને કારણે લોહીલુહાણ અને ગંભીર રીતે ઇજાગ્રસ્ત હાલતમાં પડેલા હતા. તેમને માથાના ભાગે ગંભીર ઈજાઓ પહોંચી હતી. ૧૦૮ની ટીમે સમય ગુમાવ્યા વગર રાજેશભાઈને પ્રાથમિક સારવાર એમ્બ્યુલન્સમાં જ આપી અને વધુ સારવાર અર્થે વલસાડ સિવિલ હોસ્પિટલમાં ખસેડ્યા હતા.
સારવાર દરમિયાન, ટીમને ઇજાગ્રસ્ત યુવક પાસેથી તેનું પાકીટ, એક મોબાઈલ ફોન તથા પલ્સર બાઈકની ચાવી મળી આવી હતી. પાકીટ તપાસતા તેમાંથી રોકડા ₹૧૫૯૫ મળી આવ્યા હતા. કોઈપણ જાતની લાલચ રાખ્યા વિના, ૧૦૮ની ટીમે આ તમામ મત્તા સિવિલ હોસ્પિટલમાં હાજર પોલીસ સ્ટાફને સોંપી દીધી હતી. આમ, ધરમપુર ચોકડી ૧૦૮ની ટીમે ફરી એકવાર માનવતાને દીપાવી સમાજમાં પ્રેરણાદાયક દાખલો બેસાડ્યો છે.
