વલસાડ શહેરમાં વાંચન સંસ્કૃતિના સંવર્ધન અને પ્રચાર-પ્રસાર માટે નિયમિત રીતે યોજાતી “પુસ્તક પરબ” વાંચનપ્રેમીઓ માટે જ્ઞાન અને પ્રેરણાનું મહત્વપૂર્ણ કેન્દ્ર બની રહી છે. દર રવિવારે સવારે 7:30થી 9:30 વાગ્યા દરમિયાન સર્કિટ હાઉસ સામે તેમજ એસ.ટી. વર્કશોપ સામે ક્રોમા-ટ્રેન્ડ્સ નજીક બે સ્થળોએ યોજાતી આ અનોખી પહેલને જૂન મહિનામાં પણ નોંધપાત્ર પ્રતિસાદ મળ્યો હતો.
પ્રોજેક્ટ ચેરપર્સન ડૉ. આશા ગોહિલ, હાર્દિક પટેલ અને તેમની ટીમના સંયુક્ત પ્રયાસોથી આયોજિત પુસ્તક પરબ દ્વારા જૂન મહિનામાં અંદાજે 500 પુસ્તકો વાચકો સુધી પહોંચાડવામાં આવ્યા હતા. આ ઉપરાંત લગભગ 260 જેટલા લોકોએ પરબની મુલાકાત લઈને વિવિધ વિષયોના પુસ્તકોમાં રસ દાખવ્યો હતો. જેના કારણે પુસ્તક પરબ પુસ્તકો અને વાચકો વચ્ચે એક મજબૂત અને જીવંત સેતુ તરીકે ઉભરી આવી છે.
આજના ડિજિટલ યુગમાં મોબાઇલ અને સોશિયલ મીડિયાના વધતા પ્રભાવ વચ્ચે પુસ્તકોનું મહત્વ યથાવત્ રહ્યું છે. પુસ્તકો માત્ર જ્ઞાનનો ભંડાર જ નથી, પરંતુ વ્યક્તિના વિચાર, સંસ્કાર, સંવેદના અને સર્જનાત્મકતાના વિકાસ માટેનું શક્તિશાળી માધ્યમ પણ છે. એક ઉત્તમ પુસ્તક વ્યક્તિને નવી દિશા અને નવી દૃષ્ટિ પ્રદાન કરી શકે છે. આ જ હેતુને ધ્યાનમાં રાખીને પુસ્તક પરબ દ્વારા સમાજમાં વાંચનની આદતને પ્રોત્સાહન આપવાનો પ્રયાસ કરવામાં આવી રહ્યો છે.
જૂન મહિનામાં નવા વાચકોની સંખ્યા પ્રમાણમાં ઓછી જોવા મળી હતી, પરંતુ ઉનાળુ વેકેશન પૂર્ણ થતાં બાળકો અને કિશોરોએ ખાસ રસ દાખવી પરબની મુલાકાત લીધી હતી. બાળકોમાં વાંચન પ્રત્યે વધતો રસ આયોજકો માટે સકારાત્મક સંકેત માનવામાં આવી રહ્યો છે.
પરબની મુલાકાત લેનાર વાંચનપ્રેમીઓમાં પ્રા. ડૉ. નિમેષ માલી, ડૉ. વર્ષા પટેલ, ડૉ. પ્રતિચી, પાયલ યાજ્ઞિક, વેદ પટેલ, હર્લિન સોલંકી, સાગર પટેલ, અલીન સોલંકી, મનીષ જોશી, પ્રિયા પટેલ, હેમંત બલસારા, હેતસ્વી મૈસુરી, પ્રીના પટેલ, રજનીશ ગૌતમ અને ઋત્વિક સહિતના અનેક વાચકોનો સમાવેશ થાય છે.
પુસ્તક પરબનો મુખ્ય ઉદ્દેશ માત્ર પુસ્તકોનું વિતરણ કરવાનો નથી, પરંતુ સમાજમાં વાંચનની જ્યોત સતત પ્રજ્વલિત રાખવાનો છે. આ પહેલ દ્વારા જ્ઞાન, વિચાર અને સંસ્કારના બીજ વાવવામાં આવી રહ્યા છે તેમજ શહેરના વાંચનપ્રેમીઓને સરળતાથી પુસ્તકો ઉપલબ્ધ થઈ રહ્યા છે.
આ અંગે ડૉ. આશા ગોહિલે જણાવ્યું હતું કે, પુસ્તક પરબ દ્વારા વધુમાં વધુ લોકો સુધી પુસ્તકો પહોંચાડીને વાંચન સંસ્કૃતિને મજબૂત બનાવવાનો સતત પ્રયાસ કરવામાં આવી રહ્યો છે. વલસાડમાં પુસ્તક પરબ આજે વાંચનપ્રેમીઓ માટે એક વિશ્વસનીય અને લોકપ્રિય મંચ બની રહી છે, જે સમાજમાં જ્ઞાન અને વાંચન પ્રત્યેની જાગૃતિ વધારવામાં મહત્વપૂર્ણ ભૂમિકા ભજવી રહી છે. 📚
